Cualchi zornade fa o ai ricjatât, daspò tancj agns, un omp unevore impuartant par me. Un che mi à insegnât unevore. No robis, ch’a no coventin, ma scletece di vite, di umanitât e di veretât, cu la letare piçule - che ben s’intint - , ma ungrum miôr che balis e fufignis adimplen. Di cualchi an al vîf parie cuntun cancar, doi fiis maraveôs e une femine che, si viôt a colp, i ûl un ben di vite. O soi lât a cjatâlu cuntun gno “vieli” student di cuindis agns fa. Un di chei ch’e an menât ben, che no si son rincoionîts cul lâ dal timp, che no an dismenteât che vivi vuè e culì nol compuarte deventâ, di sante scugne, integrâts, borghês, storlocs e frustrâts ch’a fasin finte di nuie fincuanch’e rive l’ore che no si po plui contâle... Mi pareve ch’a no fossin passâts dibot dîs agns, ma cualchi zornade. Al fevelave cu la sgrimie e il snait ch’o m’impensavi benon, cu la culture, la passion e l’amôr pe vite, pe storie e pe glesie ch'o i vevi simpri cognossût. Ancje cuanche s’ingrintave, ancje cuanche s’induvinave la malincunie tai soi voi, sot la mascare di une ironie ch’e sfolmenave. Meni al è un predi ch’al à cjatât la sô strade. Menut al è – e al sarà simpri - un (vêr) predi. La Glesie, cu la letare grande, prin o daspò, e varà d’impensâsi di trop mâl che i à fat ai soi fiis e, soredut, di ce ch’e à piardût esiliant e ostracizant sence remission omps di cheste fate.

Alegorie (storiute cence cjâf ni cjaveç)

Siôr santul al scrîf, fasint la solite penze predicje morâl ai soi "afezionâts" letôrs (migo cagneris: al è un che, par solit, al fevele di se cul "nô" maiestatic!), che no bisugne lâ daûr al "capitalisim di cowboy" dai merecans, "comprâ cumò, comprâ cu la crisi, comprâ cence pore par scurtâ il timp de crisi, di chest martueri economic mondiâl", che "une volte, cuanche si viodevile grise, si strenzevin i cuardins dal tacuin e, prin che tes buteghis, si butave il voli tal bearç e tal ort. Par sparagnâ." E po daspò al zonte, cunvint e pinsirôs, che si scuen scomençâ "a vivi no dome cul tacuin ma ancje cul sintiment", "tornant a preseâ de vite no dome la robe di comprâ, ma soredut i valôrs di fonde" e che, biadelore, "forsit al sarès il câs di cjapâ ocasion di cheste crisi par dâi un dret a la nestre vite, par staronzâle di tancj pendacui di soreplui e par deliberâle di tancj pês di masse che le scjafoin." Peraulis che a confuartin e a scjaldin il cûr: mancomâl ch'o vin predis cussì ben sestâts, profonts e coerents! Po dopo, sabide stade, o meni mê fie a scout a Tarcint e, fasint manovre tal curtîl de canoniche cu la mê viele Nissan Serena di seconde man e un pêl malsestade (ma che à di tignî dûr ancjimò ben a dilunc!), mi scjampe il voli tal "garage" de canoniche: po no ti viòdijo - li che, par solit, al met a sotet la machine siôr santul - une Passat 2.0 Tdi gnove di scree, pôc sù pôc jù 30.000 euro(s)? La vecje, une Passat ancje chê, e jè lade fruçade (mi an dit daspò) intun incident, par furtune sence nissun damp pa l'autist. Cuissa parcè, mi ven inliment il gno vecjo plevan, pre' Checo, ch'al à simpri fruiât A 112, Uno e Punto fincuanche a colavin a tocs... E o mi visi benon ancje dal gno unic vêr pari spirituâl, pre' John, ch'al viazave cuntune 127, prin, cuntune Panda, daspò, che parie al à lassât la scusse vignint jù dal Lussari... Ancjimò orepresint no rivi adore di perdonâlu: mi à lassât masse dibessôl... E m'impensi ancje di un gnò cjâr amì di agnorums, cumò ancje lui predi, ch'al torzeone orepresint cuntune viele machinute, une Saxo, e che no s'insumiarès, nancje se i rivàs di ribe jù in regâl, di mudâle cuntune siore berline gnove e costose: par menâ atôr un biât predi dibessôl no covente une limousine! Siôr santul, benedet, tu tu scrivis (avonde) ben, ma jo o fâs fature a croditi...