Siarade la “leture continue de Bibie par furlan”.
Une biele iniziative di marketing culturâl, linguistic-lenghistic e spirituâl, cun tant di events - o efiets?! - colaterâi, cupiade dal forest (no si po pratindi, chentivie, masse origjinalitât!) ch’e à vût un grum di sucès, stant a ce ch’a contin i media.
No stenti a crodi: vuè, dut ce ch’al è spetacolâr, mediatic, strambut, gnotul, ben sburtât e vueleât al à, par solit, une buine riusside. Sidinò, cui che lu organize al à cûr di restâ sberlufît e malapaiât e, in dì di vuè, no si po augurâlu a dinissun.
Ancje il Signôr al sarà restât a viodi une tâl: papavars pulitics, inteletuai, predessam gruês e minût, artiscj, int di ogni sorte a dâsi in note e in volte a lei il “libri dai libris”. Cuissà ce fote, biât Crist: ai soi timps no i jere lade cussi ben, parfin i soi “amîs”, intal moment plui grivi, lu vevin lassât cul pavêr in man.
Mancumâl che i furlans, di riunde o di sielte, a an mendât la viele falope e pandût a clâr trop crodints ch’a son e trop che ur sta a cûr il Dei verbum.
Une leture cussì ti disberdee la cussience par agnorums: o scrupuli che l’ideâl al sarès inmaneâle puntuâl ogni cinc, dîs agns e insiorâle cu l’indulgjenzie plenarie par cui ch’al lei ancje dome un flât o un bocon de sante peraule.
Dut a glorie di Diu e in pro de gjonde eterne di pre Checo e di pre Toni recuie...
Cucait achì la sflandorose storie dal "event":
http://www.arlef.it/ativitats/bibie/leture-continue-de-bibie-par-furlan; http://s2ew.udine.chiesacattolica.it/arcidiocesi_di_udine__il_portale_online_/archivio_notizie/00004762_Boom_di_adesioni_per_la_Lettura_integrale_della_Bibbia.html
songwriter
P.S. 14 di setembar 2011. Piçule zonte: un event cussì si scuen - santescugne - fâlu rionâ ben e no mâl e plui a dilunc che si po. Juste e sacrosante. Ve ca, duncje, la prionte "par visâsi di cheste grande ocasion culturâl che e à rivât a vê une rispueste di popul grandonone, esaurint subit i puescj a disposizion tant che letôr e cun tancj di lôr che a varessin vût gole di partecipâ restâts fûr":
http://www.lapatriedalfriul.org/?p=7349#more-7349
http://www.lavitacattolica.it/arcidiocesi_di_udine___il_portale/archivio_notizie/00005685_Speciale__Leture_continue_de_Bibie_par_furlan__su_La_Patrie_dal_Friul.html .
La prossime volte, us sconzuri pa l'amôr di Diu, viodêt di proviodi pal miôr e di no lassâ a pît e cun tant di bocje ducj chei biâts: salacôr si podarès lei la Bibie par furlan, un sproc ca e un sproc là, jenfri un tai, une ziguzaine, un plat di salamp e un frico a Friuli Doc...
Cuissà ce "speciâl" ch'e inmanearès la benemerite "storiche riviste in lenghe furlane" La Patrie dal Friûl" par sclarî une volte par simpri che "Friuli Doc nol è dome enogastronomie"!
O resti (par cumò) in seneose spiete.
